پاکستان کے جنوبی وزیرستان میں فوجی آپریشن کے دوران پانچ دہشتگرد، سات فوجی اہلکار ہلاک

پاکستان کی فوج کے شعبہ تعلقات عامہ (آئی ایس پی آر) نے کہا ہے کہ ضلع جنوبی وزیرستان ایک آپریشن کے دوران پانچ دہشت گردوں کو ہلاک کیا گیا ہے۔
بدھ کو جاری کیے بیان میں آئی ایس پی آر نے بتایا کہ شدید فائرنگ کے تبادلے میں سات فوجی اہلکار بھی مارے گئے۔
آئی ایس پی آر کے مطابق سکیورٹی فورسز نے ضلع جنوبی وزیرستان کے علاقے آسمان منزا میں دہشت گردوں کی موجودگی کی انٹیلی جنس اطلاع کی بنیاد پر آپریشن کیا۔
فوج کے ترجمان نے کہا ہے کہ علاقے کا محاصرہ کر کے سرچ آپریشن جاری ہے تاکہ علاقے میں باقی رہ جانے والے دہشت گردوں کا صفایا کیا جا سکے۔
خیال رہے کہ افغانستان کی سرحد کے ساتھ لگنے والے سابق قبائلی علاقوں میں پاکستان کی فوج دہشت گردوں کے خلاف وقتا فوقتا آپریشنز کرتی رہتی ہے۔
یاد رہے کہ رواں سال فروری میں جنوبی وزیرستان میں سیکیورٹی فورسز کی چیک پوسٹ پر حملے کرنے والے چار دہشت گرد جوابی کارروائی میں ہلاک ہوئے ہیں۔
دہشت گردوں کے ساتھ جھڑپ میں چار فوجی اہلکار بھی مارے گئے تھے۔

اپنا تبصرہ بھیجیں